孤盲有伸，尷尬會大

【文／羅肇錦∕國立中央大學客家語文暨社會科學學系榮譽教授】

 

　　這兩十年來，全世界人个生活方式同生活重心歸個仔改變淨淨，不管學習知識、談論問題也係溝通問題个方式，全部就用網路來完成。甚至主管同員工、爺哀同子女、老公同餔娘、朋友同鄰居之間个生活重心，全部分手機同網路媒體所控制。大家生活範圍就淨網路世界，生活對象唯一知腹知心相親相惜个就係手機。無手機毋會買東西食，會餓死；無手機無辦法同人溝通，會孤栖寂寞；無手機無辦法買票坐車；無手機無辦法上網掛紙，反正歸日生活就愛靠手機來維持，這實在就「孤盲有伸，尷尬會大。」

　　手機網路盛行，大家擘開目珠上網看消息。像舊年網路流行一個笑話，講有一儕人，佢挑挑安佢畜个狗仔安到「不要動」，結果見擺愛喊狗仔過來，就大聲講：「不要動，過來」，無就講：「過來，不要動」，就恁樣，喊無幾久，這隻狗仔就癲忒了，因爭狗仔搞毋清楚算來喊佢愛停動也係毋好停動。這正經係「孤盲有伸，尷尬會大。」

　　另外，今年過年，吾姪仔到網路買著矺年錢个絡仔，紅絡仔頂項印等：「不乖，就要收回。」堵堵拿矺年錢分正讀小學二年，識字毋多吂已知人我个外甥女，細阿妹仔看著「不乖要收回」嗄變到當緊張，拿等紅絡仔毋敢講話。𠊎看著這種情形遽遽拿矺年錢放落紅絡仔項，寫等「太乖，要收回」。無想著，搣到佢囥到厥姆个背後，無噭也做毋得。正經係「孤盲有伸，尷尬會大。」

　　講到這，𠊎又想起春秋時代同孔子共下个名人「鄧析子」，佢精明又孤盲，專好搣續人。聽講當時就有該好額人，坐船去到該船項，好額人个屋家人，愛去收屍買轉，無想著船家愛討當多錢正肯分佢收屍，好額人个屋家人毋甘願，就去請教鄧析子，恁樣个情況愛仰結煞正好，鄧析子笑笑仔講：「你做你放心，船頭家留下屍體乜無結無煞，除忒你，無人肯出錢來買屍首，你就慢慢仔等。鄧析子个做法，正經係「孤盲到有伸，尷尬正會大。」
　　
羅肇錦教授 聲檔 — 孤盲有伸，尷尬會大 （四縣腔）





　

▲BACK